Bang Media

Indirimbo z'Imana Videos

Abavuga ko barwanya Leta y’u Rwanda barasaza imigeri - Minisitiri Mitali

 Minisitiri Mitali abwira abaturage
Abavuga ko barwanya Leta y’u Rwanda barasaza imigeri - Mitali



Minisitiri w’umuco na Siporo, Protais Mitali, kuri uyu wa Kane, yavuze ijambo ahamya neza ko abavuga ko barwanya Leta y’u Rwanda nta ngufu bafite, ariko ko Abanyarwanda batagomba kwirarara.


Minisitiri Mitari yagaragaje uko abona abavuga ko barwanya ubutegetsi buriho ku munsi wa 22 w’ igikorwa cyo kuzengurutsa urumuri rw’icyizere mu turere tugize u Rwanda, tariki ya 13 Werurwe mu karere ka Gatsibo, mu cyahoze ariko komine Murambi. Muri aka gace hazwiho kuba harabereye kwica Abatutsi benshi bigizwemo uruhare n’uwari Burugumesitiri w’iyi Komine, Gatete Jean Baptiste.

Mitari yibukije Abanyarwanda ko bagomba kwishimira ibyo bamaze kugeraho nyuma y’imyaka 20 u Rwanda rumaze ruvuye muri Jenoside, ariko ntibabure kwirinda abarwanya Leta, ahamya ko nta ngufu bafite uretse “gusaza imigeri”.

Mitali yagize ati “Uwavuga ko barimo gusaza imigeri ntabwo yaba abeshye, ariko iyo umuntu asaza imigeri, ashobora kugutera ivumbi cyangwa icyondo kubera ya migeri arimo asaza, ndagira ngo icyo cyondo, iryo vumbi n’amasarabwayi byaturuka muri iyo migeri basaza, twirinde ko yagira uwo yanduza cyangwa yakomeretsa, muri make yagira uwo itera icyasha.”

Yakomeje agira ati “Ndavuga ibi kuko hari amagambo menshi ngenda numva y’abari hanze, murabazi ko batari na kure bo muri FDLR, abo mu mashyaka akorera hanze biyemeje gukorana n’amashyaka arwanya igihugu, n’abandi bagira ibyo bavuga, bashaka kugaragaza ko hari urukundo bafitiye Abanyarwanda, ndagira ngo mbabwire ko abo bantu nta rukundo na mba, nongere mvuge ngo na mba, bariya ni inda zabo mbi, ni imigambi mibisha tugomba kwamaganira kure
, ni ukuvuga ko tugomba kwirinda ko batuvangira, tugomba kumenya kureba aho igihugu kigana, iterambere gishaka guha Abanyarwanda abashaka kubayobya ntitubumve.”

Ubuhamya butangwa kuri Jenoside ni ubwo kwitondera

Nk’uko muri iki gikorwa cyo kuzengurutsa urumuri mu gihugu, bamwe mu bakoze Jenoside yakorewe Abatutsi mu Rwanda bireze bakemera icyaha bahabwa umwanya bagatanga ubuhamya, uwitwa Kadubiri wo mu Murenge wa Kiziguro ubwo yatangiraga gutanga ubuhamya ntibwarangiye kuko ubuyobozi bwavuze ko byari bitangiye guteza ikibazo kuri bamwe, ahita ahagarikwa ako kanya.

Kadubiri ubwo yavugaga ko ari mu bishe imbaga y’Abatutsi bari bahungiye kuri Kiliziya ya Kiziguro, abandi bakajugunywa mu rwobo ari bazima, Minisitiri Mitali yavuze ko iri jambo rigomba guhagarara kuko ryari ritangiye gutera agahinda abati bake, aha akaba ari naho yanavuze ko abategura abatanga ubuhamya kujya babyitondera.

Yagize ati “Gutanga ubuhamya bigomba kwitonderwa, ubuhamya ni bwiza turanabushigikiye kuko bamwe baticwaga berekana uko icyo gikorwa cyagenze, ariko noneho bakanagaragaza uko nyuma ya Jenoside habaye gahunda yo kongera kubanisha Abanyarwanda no kongera kwiyubaka, niba ari naho Kadubiri yari bugere, ariko yatangiranye ubukana bukomeye cyane ku buryo bamwe bari batangiye kumererwa nabi, niyo mpamvu twamuhagaritse wabonaga abantu batangiye guhungabana cyane, iyo abantu batanga ubuhamya cyane cyane mu ruhame ni ngombwa ko abantu bajya babyitwararika.”

Abanyarwanda bagomba kurwanira amahoro

Mitali yongeye kuvuga ko nyuma y’aho Umukuru w’Igihugu Paul Kagame avugiye ko aho bizaba ngombwa yiteguye guhanganira Abanyarwanda, nabo ntibakwiye kumva iyi ntero ngo baterere iyo, bagomba kumufasha.

Yagize ati “Aho bibaye ngombwa tugomba kuzafasha Perezida guhanganira amahoro y’u Rwanda, uko niko tuzaba twikirije intero ye, guhangana kwiza ni ugufasha Umukuru w’igihugu ku byo yababwiye, kandi mukanibuka gahunda ya Ndi umunyarwanda, nta mahitamo dufite uretse kuyimakaza, nituyigira iyacu nta kababuza ko tuzivana mu bibazo twaciyemo.”

Yakomeje avuga ko hatabura gushimirwa ingabo zahose ari iza FPR-Inkotanyi, ziyobowe na Perezida Kagame zashoboye kuvana igihugu mu icuraburindi, anasaba buri mu Nyarwanda kwegera uwarokotse Jenoside akamufasha kwivana mu bibazo byabo byihariye.

Uyu muhango wo kwakira urumuri rutazima wabereye kuri kiliziya ya Kizuguro, hamwe mu haguye imbaga y’Abatutsi batari bake, tariki ya 11 Mata 1994.

Mitali yashimangiye ko nyuma y’imyaka 20 habaye Jenoside, kugeza ubu buri munyarwanda abona aho igihugu kigeze cyiteza imbere, ashimangira ko na mbere iyo abayobozi bataza gutegura Jenoside ntiyari kuba.


IGIHE

Related Posts by Categories



Sem comentários:

Enviar um comentário

Related Posts Plugin for WordPress, Blogger...